भुरग्यांचीं नांवां | Konkani Baby Names

श्रवण मकर राशीच्या १० अंशांसावन २३ अंश २० कलांमेरेन आसता आनी चारूय चरण मकर राशीभितरूच सामावतात. चरणांचे नवमांश मेष, वृषभ, मिथुन आनी कर्क अशे येतात.

खी, खू, खे, खो हीं चारूय अक्षरां एकाच 'ख' व्यंजनाचीं स्वररूपां. उत्तराषाढेकडेन सोंपिल्ल्या 'ज' माळे उपरांत अक्षरचक्र 'ख' कडेन वळटा आनी तो पुराय पांवडो एकाच नक्षत्राचेर पडटा. सोय अशी की चरण नेमकें खबर नासलें तरी व्यंजन तेंच उरता; आडचण अशी की कोंकणींत 'ख' न सुरू जावपी पारंपरीक नांवां मेजकींच आसात — खंडेराव, खेमराज, खुशी अशीं कांय. खंडोबाक कुलदेव मानपी कुळांनी मात 'खं' क मानाची सुवात आसा.

श्रवणाचो अधिपती चंद्र, देवता विष्णू, गण देवगण, योनी वानर आनी चिन्न विष्णूचीं तीन पावलां वा कान.

'श्रवण' म्हळ्यार आयकप, आनी तेंच ह्या भुरग्यांचें बळगें आसता — तीं उलोवपापरस आयकून शिकतात, आनी आयकिल्लें याद दवरतात. यादशक्त धारदार, देखून भास, तोंडपाठ करप, गायन हातूंत तीं बेगीन मुखार वतात. दुसऱ्याचें दुख्ख समजून घेवपाची तांक व्हड आशिल्ल्यान इश्ट-मंडळी हांचेकडेन मन मेकळें करूंक येतात. शिक्षण, अणकार, संगीत, कीर्तन-प्रवचन, समुपदेशन, माध्यमां आनी ग्रंथालयशास्त्र ह्या मळांनी हांकां समाधान लाबता. आयकिल्ल्या गजालींचेर रोखडोच विस्वास दवरचो न्हय, इतलो संस्कार गरजेचो.

श्रावण म्हयन्याचें नांवूच ह्या नक्षत्रावेल्यान आयलां आनी गोंयांत श्रावण म्हळ्यार व्रतांचो म्हयनो — श्रावणी सोमाराचे उपास, आयतार पुजप, नागपंचम, सुतां पुनव. ह्या म्हयन्यांत जल्मल्ल्या बाळाचें बारसें श्रावणी सोमारा करपाचो आग्रो जायत्या घरांनी धरतात आनी त्या दिसा शिवदेवळांत अभिशेक करून मागीरूच पाळणो हालयतात.

आवय-बापायचो प्रस्न हांगा थारिल्लो — 'ख' न सुरू जावपी कोंकणी नांव रोखडेंच सुचना, कितें करचें? भटजी 'खं' कडेन बोट दाखयतात: खंडेराव, खंडू हीं खंडोबाकडेन जोडिल्लीं नांवां कांय घराण्यांनी कुलदेवाच्या नात्यान पयलींच चलत आयिल्लीं आसतात, देखून आज्जाचें नांव आनी नक्षत्राक्षर एकाच वेळार सांबाळटात. चलयांखातीर खुशी, खेवना हे हालींच रुळिल्ले पर्याय.