भुरग्यांचीं नांवां | Konkani Baby Names

पूर्वा फाल्गुनी सिंह राशीच्या १३ अंश २० कलांसावन २६ अंश ४० कलांमेरेन पातळटा; चारूय चरण सिंहांतूच उरतात, देखून रास थारायतना गोंदळ ना. चरणांचे नवमांश मात सिंह, कन्या, तूळ आनी वृश्चिक अशे क्रमान मुखार सरतात.

मो, टा, टी, टू ह्या चार अक्षरांतल्यान अक्षरचक्राचो एक कठीण सांदो दिसता. पयलें अक्षर 'मो' हें मघेच्या 'म' माळेचो शेवट; दुसऱ्या चरणासावन 'ट' माळ सुरू जाता. आनी हांगाच खरी आडचण आसा — कोंकणींत 'ट' न सुरू जावपी पारंपरीक नांवां लागीं लागीं नात. टागोर, टीना, टूषार अशीं मेजकीं नांवां प्रचारांत हाडल्यांत, पूण चड करून कुटुंबां 'मो' ह्या पयल्याच अक्षराकडेन वळटात आनी मोहन, मोहिनी, मोहित अशीं नांवां वेंचतात.

पूर्वा फाल्गुनीचो स्वामी शुक्र, देवता भग, गण मनुश्यगण, योनी मूषक आनी चिन्न पलंगाचे मुखावेले दोन पांय.

शुक्राचें नक्षत्र आनी भग ही ऐश्वर्याची देवता, देखून ह्या भुरग्यांक सूख, सोबाय आनी रसिकपणाची ओढ ल्हानपणासावन आसता. इश्टागत करपांत हीं पटाईत; खंयच्याय नव्या सुवातेर धा मिनटांनी रुळटात. कश्टांपरस कुशळटायेन काम काडून घेवपाचो कल आसता, देखून चिकाटीचे धडे दिवप गरजेचें. कला, नाटक, फॅशन, सोबायेचीं साधनां, हॉटेल-पर्यटन, लग्नसंस्था आनी लोकसंपर्क ह्या मळांनी हांकां येस मेळटा. आळस टाळ्ळो जाल्यार हीं खूब मुखार वतात.

बारशाच्या दिसा न्हेसून-नटून बसप आनी सगळ्यांचें लक्ष ओडून घेवप हें ह्या नक्षत्राच्या बाळाचें जशें थारिल्लेंच, अशी फकाणांची म्हण कांय घरांनी आयकूंक मेळटा. पाळण्याची सजावट, नवे कपडे आनी सोयऱ्यांची गर्दी हांकां शुक्राच्या ह्या नक्षत्रार खास सोबाय येता.

आवय-बापायचो प्रस्न हांगा अगदीं थेट आसता — 'ट' न सुरू जावपी कोंकणी नांव मेळना, मागीर नक्षत्र सोडून दिवचें काय? भटजी सांगतात ना; चारांतलें खंयचेंय अक्षर चलता देखून 'मो' घेवचें. म्हार्दोळची म्हाळसा ही विष्णूचें मोहिनीरूप म्हूण मानतात देखून मोहिनी हें नांव गोंयांत खास लोकप्रिय, आनी आज्जाचें नांव मोहन, मोतीराम अशें आसल्यार नक्षत्र आनी कूळ दोनूय एकाच फांतरान साधतात.